غزہ کی پٹی میں اسرائیل کی عسکری کارروائی شروع ہونے کے بعد اپنے گھر چھوڑنے اور پناہ کی تلاش میں سرگرداں 20 لاکھ لوگوں میں نصف تعداد بچوں کی ہے۔ اقوام متحدہ کے ادارہ برائے اطفال (یونیسف) کا اندازہ ہے کہ ان میں تقریباً 17 ہزار بچے والدین کے سائے سے محروم ہو چکے ہیں۔ 

یونیسف کے ترجمان جوناتھن کرکس نے فروری کے اوائل میں غزہ کا دورہ کیا۔ اس دوران وہ جن بچوں سے ملے یا بات کی ان میں سبھی اپنے خاندان کا کوئی ایک رکن کھو چکے تھے۔

انہوں نے ایک ایسی بچی سے بھی بات کی جس کی والدہ، والد، دو بہنیں اور بھائی جنگ کے ابتدائی ہفتوں میں بمباری سے ہلاک ہو گئے تھے۔ جب یہ واقعہ پیش آیا اس وقت وہ خاندان کے ساتھ اپنے چچا کے گھر میں تھی۔ اس کی ایک ٹانگ پر گہرا زخم آنے کے باعث اسے کاٹنا پڑا۔

ایک یتیم خانے میں انہوں نے چھ اور چار برس عمر کے دو چچا زاد بچوں سے ملاقات کی جن کے پورے خاندان دسمبر کے ابتدائی دو ہفتوں میں ہلاک ہو گئے تھے۔ ان میں چار سالہ بچی اب بھی صدمے کی کیفیت میں تھی۔

خوراک، پانی یا پناہ کی سہولیات کی شدید قلت اور اپنے بچوں کی نگہداشت میں مشکلات  کا سامنا کرنے والے خاندانوں کو جنگ میں ہلاک ہو جانے والے اپنے رشتہ داروں کے بچوں کو سنبھالنے میں مشکلات کا سامنا ہے۔

جنگ سے بچوں کی ذہنی صحت بری طرح متاثر ہوئی ہے۔ انتہائی درجے کا خوف، بھوک کا خاتمہ اور نیند نہ آنا اس کی نمایاں علامات ہیں۔ بم دھماکوں کی آوازیں سن کر وہ جذباتی ہیجان یا دہشت کا شکار ہو جاتے ہیں۔

اس جنگ سے پہلے بھی غزہ میں پانچ لاکھ سے زیادہ بچوں کو ذہنی و نفسیاتی صحت کے حوالے سے مدد کی ضرورت تھی۔ اندازے کے مطابق اب 10 لاکھ سے زیادہ بچوں کو یہ مدد درکار ہے۔

"مذہب، قومیت، زبان اور نسل سے قطع نظر کسی ایک بچے کو بھی 7 اکتوبر یا اس کے بعد پیش آنے والے واقعات جیسی سطح کے تشدد کا سامنا نہیں ہونا چاہیے۔"

جوناتھن کرکس، فلسطینی علاقوں میں یونیسف کے ترجمانِ اعلیٰ 

جانیے کہ غزہ کے بچوں کی مدد کیسے کی جائے۔