جنرل اسمبلی کے حالیہ اجلاس کو 'یو این جی اے 78' کا نام بھی دیا گیا ہے جس کے مصروف ترین ہفتے میں کانفرسوں، ذیلی اجلاسوں، تقاریر اور اقوام متحدہ کے ہیڈکوارٹر کی راہداریوں میں رہنماؤں کی ملاقاتوں کی روداد سے آگاہ کرنے کے لیے دنیا بھر سے بڑی تعداد میں میڈیا کے نمائندے بھی شریک ہیں۔

اقوام متحدہ کے ہر رکن ملک کا نمائندہ جنرل اسمبلی کے ہال میں تقریر کر سکتا ہے۔ یوکرین کے صدر وولودمیر زیلنسکی نے اپنے ملک پر روس کے بڑے پیمانے پر حملے کے بعد اقوام متحدہ میں بالمشافہ طور پر اپنی پہلی تقریر کی۔

جنرل اسمبلی کے اعلیٰ سطحی ہفتے کے اہم مقاصد میں پائیدار ترقی کے اہداف (ایس ڈی جی) بین الاقوامی ایجنڈے پر سرفہرست ہیں۔

پائیدار ترقی کے 17 اہداف کی جانب پیش رفت کی رفتار تیز کرنے کے طریقوں کا جائزہ لینے کے لیے دو روزہ کانفرنس کا انعقاد عمل میں آیا۔

دیگر معروف شخصیات کے علاوہ ایس ڈی جی کے حمایتی اور عالمی سطح پر معروف چیلو نواز یو یو ما بھی جنرل اسمبلی میں آئے اور ان اہداف کے حوالے سے موسیقی کا مظاہرہ پیش کیا۔

ایس ڈی جی کانفرنسوں میں شرکت کرنے والے اقوام متحدہ کے اعلیٰ سطحی عہدیداروں میں سیکرٹری جنرل انتونیو گوتیرش (بائیں) اور نائب سیکرٹری جنرل امینہ محمد بھی شامل تھے جنہوں نے ان اہداف کے حصول میں رکن ممالک کو مدد دینے کی اہمیت واضح کی۔

جنرل اسمبلی میں موسمیاتی بحران پر بھی روشنی ڈالی گئی اور دنیا بھر میں اس سے بری طرح متاثرہ لوگوں نے اپنے خیالات کا اظہار کیا۔ یہ پہلا موقع ہے جب خطاب کے لیے مدعو کیے جانے والوں سے کہا گیا کہ وہ عالمی حدت میں اضافے کا باعث بننے والی گرین ہاؤس گیسوں کے اخراج میں کمی لانے کے قابل اعتبار منصوبے بھی پیش کریں۔

اعلیٰ سطحی ہفتے میں بڑے چھوٹے سیکڑوں اجلاس ہوئے اور جنرل اسمبلی میں آنے والی ممتاز شخصیات نے دوطرفہ ملاقاتیں کیں۔

اقوام متحدہ کے سیکرٹری جنرل نے متعدد اجلاسوں میں شرکت کی اور درجنوں عالمی رہنماؤں سے انفرادی طور پر بھی ملے۔

اس ہفتے میں صدور، وزرائے اعظم، سربراہان مملکت اور دیگر ممتاز شخصیات کی تقاریر کے بعد عمومی مباحثہ 26 ستمبر تک جاری رہنا ہے جس کے بعد 'یو این جی اے 78' کا محنت طلب کام آگے بڑھایا جائے گا۔