غیرفوجی یوکرینی بحری جہاز پر روسی حملے پر افسوس کا اظہار
امن اور سلامتی
یوکرین میں اقوام متحدہ کی امدادی رابطہ کار ڈنیز براؤن نے یوکرین کے شہر اوڈیسا میں بحیرہ اسود کی بندرگاہ پیوڈینی میں غیرفوجی بحری جہاز پر روس کے حملے کو ازحد افسوس ناک قرار دیا ہے۔
ان کا کہنا ہے کہ بندرگاہوں پر روس کے سفاکانہ اور بے رحمانہ حملوں کے نتائج یوکرین کی معیشت اور دنیا بھر میں بھوک کا سامنا کرنے والے کروڑوں لوگوں کے لیے تباہ کن ہوں گے۔
ایک بیان میں انہوں نے کہا کہ بدھ کو ہونے والے اس حملے کا ارتکاب جنگی کارروائیوں کے ایک سلسلے کے بعد ہوا جن میں عام شہری ہلاک و زخمی ہوئے، اناج کی ترسیل کا نظام تباہ ہوا اور اس ساحلی شہر میں فنون لطیفہ کے تاریخی عجائب گھر کو نقصان پہنچا۔
بندرگاہیں نشانے پر
انہوں نے بحری جہاز چلانے والے اہلکار کی ہلاکت پر افسوس اور زخمیوں کی صحت یابی کی خواہش کا اظہار کیا۔
جولائی میں روس کی جانب سے بحیرہ اسود کے راستے اناج کی برآمد کے اقدام سے دستبرداری کے بعد یوکرین کی بندرگاہوں پر 30 سے زیادہ حملے ہو چکے ہیں لیکن یہ پہلا موقع ہے کہ کسی تجارتی جہاز پر حملے میں غیرفوجی اہلکار ہلاک و زخمی ہوئے ہیں۔
اطلاعات کے مطابق، جہاز کے زخمی ہونے والے عملے میں فلپائن سے تعلق رکھنے والے اہلکار شامل ہیں۔