Josette Sheeran, Mkurugenzi Mkuu wa Shirika la Miradi ya Chakula Duniani (WFP), kwenye risala aliotoa mnamo siku ya pili ya Mkutano Mkuu wa Dunia juu ya Udhibiti Bora wa Akiba ya Chakula unaofanyika Roma, Utaliana, alisema raia wote wa kimataifa - na sio viongozi wa dunia pekee - wanawajibika kuhamasishwa wajitayarishe kuwapatia chakula watu bilioni moja ziada wenye kusumbuliwa na tatizo la njaa sugu ulimwenguni.

Imeripotiwa hii leo kwamba viongozi wa kimataifa wameafikiana kuakhirisha yale majadiliano ya kufikia mapatano juu ya mabadiliko ya hali ya hewa katika mkutano ujao utakaofanyika mwezi Disemba katika Copenhagen, na badala yake wamekubaliana kwamba mkutano huu wa mabadiliko ya hali ya hewa ujaribu kufikia itifaki isio na uzito "wenye masharti ya kisiasa" ili kuwawezesha wajumbe wa kimataifa kuhakikisha masuala magumu yenye kutatanisha majadiliano yao yatazingatiwa kidhati katika siku za baadaye.

Hilde F. Johnson, Naibu Mkurugenzi Mkuu wa Shirika la UM juu ya Mfuko wa Maendeleo kwa Watoto (UNICEF) ametoa mwito unaopendekeza kuchukuliwe hatua ziada Sudan Kusini, ili kudhibiti tatizo la upungufu mkubwa wa chakula, uliojiri kwa sasa, katika baadhi ya sehemu za eneo, ili hali isije ikageuka kuwa janga baya zaidi.

Jumuiya ya Mashirika ya UM dhidi ya UKIMWI (UNAIDS), kwenye makala iliochapishwa wiki hii katika Jarida juu ya UKIMWI, imezingatia kwa makini zaidi, suala la kama jamii ya kimataifa itafanikiwa kuzuia maambukizi ya UKIMWI katika 2015, kwa kulingana na pendekezo rakamu ya sita ya Malengo ya Maendeleo ya Milenia (MDGs).