KM Ban Ki-moon pamoja na wafanyabiasahara wa sekta ya binafsi waliohudhuria kikao maalumu kilichofanyika Makao Makuu kuzingatia juhudi za kupiga vita UKIMWI, kifua kikuu na malaria wamethibitisha kwenye taarifa zao mbalimbali umuhimu na ulazima wa kuimarisha ushirikiano wa pamoja kati ya sekta ya umma na sekta binafsi ili kuweza kudhibiti bora maradhi haya thakili yenye kusumbua umma wa kimataifa.

Wasikilizaji, mnamo mwezi Mei, kwa muda wa wiki mbili mfululizo, wawakilishi wa jamii za wenyeji wa asili kutoka pembe mbalimbali za ulimwengu walikutana kwenye Makao Makuu ya UM na kuhudhuria Kikao cha Sita cha Tume ya Kudumu ya UM juu ya Masuala yanayohusu Haki za Wenyeji wa Asili Duniani.

Naibu KM Asha-Rose Migiro aliwasilisha ripoti mpya ya UM kuhusu maendeleo katika utekelezaji wa Malengo ya Maendeleo ya Milenia (MDGs)katika mataifa ya Afrika yaliopo kusini ya Sahara. Alionya ya kuwa juhudi za kuyakamilisha malengo hayo kwa wakati ziko nyuma na zinazorota.

Dktr Margaret Chan, Mkurugenzi Mkuu wa Shirika la Afya Duniani (WHO) alihimiza viongozi na wajumbe waliohudhuria kikao cha mwaka cha sita cha bodi linaloandaa sera na miradi ya afya ya kimataifa, kinachokutana hivi sasa Geneva, Uswiss kwamba kunatakikana hima kuu ya jumla kutoka kwao wote, kujenga kile alichokiita “urithi wa afya”, kadhia ambayo alitumai ikikamilishwa itasaidia kuaboresha siha za wanawake na afya ya umma wa Afrika, kwa ujumla; kwa sababu, Dktr Chan anaamini kidhati kuwa wanawake ni fungu muhimu la umma wa kimataifa, linaloongoza kwenye harakati kadha wa kadha za maendeleo ulimwenguni.