Kuimarika kwa El Niño kunaweza kusukuma watu milioni 49 zaidi katika njaa kali: WFP
Kuimarika kwa El Niño kunaweza kusukuma watu milioni 49 zaidi katika njaa kali: WFP
Tabianchi na mazingira
- El Niño kutumbukiza watu milioni 49 zaidi katika njaa
- Amerika ya Kati na Kusini mwa Afrika kuathirika zaidi
- Ushirikiano wa kimataifa ni kitovu cha kudhibiti janga hilo
- Uwekezaji mkubwa wahitajika: Dola 1 inayowekezwa kuokoa kati ya dola 3 hadi 7
Takribani watu milioni 50 zaidi katika jamii zilizo hatarini duniani wanatarajiwa kukumbwa na njaa kali kutokana na kuimarika kwa hali ya hewa ya El Niño, limeonya leo Shirika la Umoja wa Mataifa la Mpango wa Chakula Duniani (WFP).
Kukabiliana na tishio hilo, WFP kwa kushirikiana na wadau wake tayari linaongeza juhudi katika nchi 8 ili kulinda baadhi ya jamii zilizo hatarini zaidi ambazo tayari zinakabiliwa na umaskini, migogoro, ukosefu wa ajira na athari za mara kwa mara za mabadiliko ya tabianchi.
Hatua za kipaumbele ni pamoja na kujiandaa mapema kukabiliana na mafuriko, ukame na dhoruba kabla hazijatokea.
"El Niño ni tishio kubwa kwa uhaka wa chakula wa mamilioni ya watu ambao tayari wako katika mazingira magumu. Kadri tunavyosaidia familia kujiandaa mapema kwa mishtuko hii ya tabianchi, ndivyo tunavyoongeza uwezo wetu wa kuokoa maisha na kulinda vyanzo vyao vya kujipatia kipato," amesema Carl Skau, Kaimu Mkurugenzi Mtendaji wa WFP.
Njaa kali inamaanisha hali ambapo watu hawawezi kukidhi mahitaji yao ya kila siku ya chakula.
Mambo muhimu
- Watu milioni 49 zaidi wanaweza kukumbwa na njaa kali kutokana na El Niño kuanzia mwezi Septemba.
- Idadi ya watu wanaokabiliwa na uhaba mkubwa wa chakula inaweza kuongezeka kutoka watu milioni 225 hadi milioni 274, sawa na ongezeko la takribani asilimia 22.
- Amerika ya Kati na kusini mwa Afrika zinatarajiwa kuwa miongoni mwa maeneo yatakayopata athari kubwa zaidi.
- Kila dola 1 inayowekezwa katika hatua za kuzuia mapema inaweza kuokoa kati ya dola 3 hadi 7 ambazo zingetumika baadaye katika kukabiliana na maafa na hasara.
Funzo kutokana na matukio ya awali ya El Niño
WFP imeeleza kuwa tukio la El Niño la mwaka 2015–2016 liliathiri uhakika wa chakula wa watu kati ya milioni 60 na milioni 100.
Makadirio ya awali yanaonesha kuwa El Niño ya mwaka 2026–2027 inaweza kusababisha angalau watu milioni 49 zaidi kuingia katika hali ya uhaba mkubwa wa chakula ifikapo mwisho wa mwaka ujao.
Baada ya kuchambua nchi 45 ambazo tayari zinakabiliwa na uhaba wa chakula na ambazo zinatarajiwa kuathiriwa kwa kiasi kikubwa na El Niño kupitia mabadiliko ya mvua, ongezeko la joto, mafuriko na ukame, WFP inatarajia idadi ya watu wanaokabiliwa na uhaba mkubwa wa chakula kuongezeka kutoka milioni 225 hadi milioni 274, likiwa ni ongezeko la takribani asilimia 22.
Maeneo ya Amerika ya Kati na kusini mwa Afrika yanatarajiwa kuathirika zaidi na hali mbaya za tabianchi, huku athari kubwa pia zikitarajiwa Afrika Mashariki, Asia Kusini na Asia ya Kusini Mashariki.
WFP imesisitiza kuwa athari za El Niño hutofautiana kati ya nchi.
"Baadhi ya nchi tayari zinashuhudia mvua chache kuliko kawaida, mafuriko na viwango vya juu visivyo vya kawaida vya joto, huku nyingine zikitarajiwa kukabiliwa na hali mbaya zaidi katika misimu ijayo ya upandaji na mavuno."
Matokeo ya ripoti ya WFP
- Amerika ya Kusini na Karibea zinaweza kushuhudia moja ya ongezeko kubwa zaidi la uhaba wa chakula, huku zaidi ya watu milioni 16 wakitarajiwa kuathirika.
- Amerika ya Kati inatarajiwa kuwa na ongezeko kubwa zaidi kwa uwiano, la asilimia 83.1, kuliko maeneo yote yaliyofanyiwa uchambuzi.
- Afrika Mashariki na Kusini mwa Afrika zinakabiliwa na hatari kubwa, hasa katika maeneo ambayo misimu ijayo ya mvua ni muhimu kwa uzalishaji wa chakula. Zaidi ya watu milioni 18 wanaweza kushuhudia hali yao ya uhakika wa chakula ikizorota, sawa na ongezeko la asilimia 26.
- Nchi za kusini mwa Afrika ziko katika hatari kubwa kwa sababu kaya nyingi hutegemea kilimo cha kujikimu kinachotegemea mvua.
- Asia na Pasifiki zinaweza kushuhudia athari kubwa katika nchi kadhaa ambazo tayari ziko hatarini, ambapo watu wapatao milioni 8.2 zaidi wanaweza kukumbwa na njaa kali.
- Afrika Magharibi na Kati pia zinakabiliwa na hatari, huku uhaba wa chakula ukitarajiwa kuongezeka kwa asilimia 12, na kuathiri karibu watu milioni sita zaidi.
WFP na Shirika la Umoja wa Mataifa la Chakula na Kilimo (FAO) tayari zimetoa wito wa kuongeza msaada kwa jamii zilizo katika hatari ili ziweze kujiandaa mapema kwa El Niño na hivyo kulinda maisha, vyanzo vya kipato na usalama wa chakula kabla hali haijawa mbaya zaidi.
Uwekezaji wa mapema huokoa fedha na maisha
El Niño inatarajiwa kufikia kilele chake kati ya Septemba na Desemba 2026, lakini athari zake zitaendelea kujitokeza katika sehemu nyingi za dunia mwaka 2027, kutokana na madhara yatakayopata mavuno yajayo.
WFP imeonya kuwa ukame, mafuriko na ongezeko la joto tayari vinaweka jamii nyingi katika hatari.
Kwa kushirikiana na FAO, Ofisi ya Umoja wa Mataifa ya Kuratibu Masuala ya Kibinadamu (OCHA) na wadau wengine, WFP ina mipango ya kuzuia athari mapema katika zaidi ya nchi 50, huku ikisaidia serikali na jamii kupunguza hatari za maafa.
Tangu mwezi Mei, WFP imeanzisha mipango ya hatua za mapema nchini Sudan Kusini, Chad, Mauritania, Uganda, Guatemala na El Salvador, ikitoa zaidi ya dola milioni 14 kwa msaada wa kuokoa maisha ya takribani watu 500,000.
Hatua hizo zinajumuisha kupanua mifumo ya fedha iliyopangwa mapema kama vile bima dhidi ya majanga, mikopo na malipo ya kidijitali ili kuhakikisha fedha zinapatikana haraka na kwa gharama nafuu zaidi.
Kwa mujibu wa uzoefu wa matukio ya awali ya El Niño, kila dola moja inayowekezwa katika hatua za maandalizi ya mapema inaweza kuokoa kati ya dola tatu na saba ambazo zingetumika baadaye katika kukabiliana na hasara na gharama za misaada ya kibinadamu.