Tuna wasiwasi na mauaji ya raia Syria – Kamishna Mkuu Türk

Mvulana mdogo aliyevaa hoodie ya bluu na koti akitembea kwenye kifusi cha jengo lililoharibiwa huko Idlib, Syria, huku gari likiwa limeharibika nyuma.

Tuna wasiwasi na mauaji ya raia Syria – Kamishna Mkuu Türk

9 Machi 2025 Amani na Usalama

Mauaji ya raia katika miji ya pwani kaskazini-magharibi mwa Syria yanapaswa kusitishwa mara moja, amesema hii leo Kamishna Mkuu wa Umoja wa Mataifa kuhusu haki za binadamu, Volker Türk kufuatia mfululizo wa mashambulizi yanayodaiwa kufanywa na wanamgambo wa serikali ya zamani na vikundi vingine vyenye silaha nchini humo.

"Tunapokea ripoti za kushtusha sana kuhusu familia nzima, wakiwemo wanawake, watoto na wapiganaji waliokwishasalimisha silaha, wakilengwa na kuuawa," amesema Türk katika taarifa yake iliyotolewa na Ofisi ya Umoja wa Mataifa ya Haki za Binadam, OHCHR.

Vyombo vya habari vinaripoti kuwa mapigano yamejikita katika miji ya pwani ya Tartus na Latakia ambako ni makazi ya watu wa madhehebu ya dini ya kiislamu ya Alawite, ambayo ni ya wachache na pia familia ya kiongozi wa zamani wa Syria, Bashar Al Assad ni waumini.

"Kuna ripoti za mauaji ya kiholela kwa misingi ya madhehebu ya dini yanayofanywa na wahusika wasiojulikana, wanachama wa vikosi vya usalama vya mamlaka ya mpito, pamoja na wale wanaohusishwa na serikali ya zamani,” amesema Kamishna huyo Mkuu.”

Vikundi vinavyotisha raia

Amesema kwamba tangazo la mamlaka ya mpito kuhusu nia yao ya kuheshimu sheria lazima lizingatiwe na hatua za haraka za kuwalinda wasyria, ikiwa ni pamoja na kuchukua hatua zote muhimu ili kuzuia ukiukwaji wa haki na kuhakikisha uwajibikaji unafikiwa pale unapotokea.

"Ni lazima kufanyike uchunguzi wa haraka, wa wazi na usio na upendeleo kuhusu mauaji yote na ukiukwaji mwingine wa haki, na wale wanaohusika wafikishwe mbele ya sheria, kwa mujibu wa viwango na kanuni za sheria za kimataifa," amesema. "Vikundi vinavyotisha raia pia vinapaswa kuwajibishwa."

Matukio haya pamoja na ongezeko la kauli za chuki mtandaoni na nje ya mtandao yanaonesha kwa mara nyingine tena umuhimu wa haraka wa mchakato wa haki ya mpito unaojumuisha wote, unaomilikiwa kitaifa, na unaozingatia ukweli, haki na uwajibikaji, amesema Kamishna Türk.

TAGS: Amani na Usalama/Haki za binadamu/Mashariki ya Kati/Syria/OHCHR

♦ Kurambaza ukurasa mahsusi wa Siku ya Kiswahili Duniani bofya hapa.

♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili hapa.

♦ Pia unaweza kupakua apu ili kusikiliza matangazo yetu wakati wowote popote ulipo.

♦ Tembelea pia chaneli yetu ya Youtube na pia Soundcloud na Twitter

Syria

HABARI MAHSUSI KUHUSIANA NA TAARIFA HII

Watoto watatu wamesimama mbele ya makazi ya tarp ya bluu katika kambi ya wakimbizi nchini Syria.

Ufufuaji wa uchumi wa Syria ni muhimu kwa utulivu – Ripoti ya UNDP

20 Februari 2025

Ukuaji wa Kiuchumi

Ripoti mpya ya Shirika la Umoja wa Mataifa la Mpango wa Maendeleo wa Umoja wa Mataifa (UNDP) iliyotolewa leo Februarai 20, 2025 inaonya kwamba uchumi wa Syria hautafikia kiwango chake cha kabla ya vita hadi mwaka 2080 kama ukuaji wa kiuchumi hautaongezeka kwa kasi.

Mtu aliyebeba vitu vya majira ya baridi kali, ikiwa ni pamoja na blanketi na begi, anapita kwenye makazi ya muda katika eneo la makazi nchini Syria.

Changamoto ya usalama inavuruga usambazaji wa misaada kaskazini-mashariki mwa Syria: OCHA/WFP

22 Januari 2025

Msaada wa Kibinadamu

Hali tete ya usalama inaendelea kuvuruga shughuli za kibinadamu katika sehemu nyingi za Syria, ikiwa ni pamoja na kaskazini-mashariki mwa nchi hiyo, mashariki mwa Aleppo, Deir-ez-Zor, Ar-Raqqa, na eneo la pwani, umeonya leo Umoja wa Mataifa.