Ghasia DRC: M23 yataka MONUSCO ikabidhi raia inaowalinda Goma

Familia iliyohamishwa na vita wakiwa mbele ya makazi yao ya muda huko Goma, jimbo la Kivu Kaskazini, DR Congo.

Ghasia DRC: M23 yataka MONUSCO ikabidhi raia inaowalinda Goma

18 Februari 2025 Amani na Usalama

Waasi wa M23 nchini Jamhuri ya Kidemokrasia ya Congo, DRC wametaka ujumbe wa Umoja wa Mataifa wa kulinda amani nchini humo, MONUSCO uwakabidhi raia waliosaka hifadhi kwenye maeneo ya ujumbe huo mjini Goma, jimboni Kivu Kaskazini.

Msemaji wa Umoja wa Mataifa Stéphane Dujarric amesema hayo leo jijini New York, Marekani wakati akizungumza na waandishi wa habari akinukuu wafanyakazi wa Umoja huo nchini DRC wakisema hali ya usalama imesalia tete kwenye majmbo ya Kivu Kaskazini na Kivu Kusini.

Madai ya M23 dhidi ya MONUSCO

“Jimboni Kivu Kaskazini, MONUSCO inaendelea kuhifadhi na kulinda takribani watu 1,400 kwenye maeneo yake Goma. M23 wanataka wakabidhiwe raia hao na wanalaani waziwazi kuwa MONUSCO imekuwa inaachiia wanajeshi wa serikali, FARDC kushambulia raia,” amesema Bwana Dujarric.

Ameongeza kuwa jana jumatatu umati mkubwa wa watu ulikusanyika nje ya kituo cha MONUSCO cha Lava lakini baadaye waandamanaji hao walitawanyika kwa amani.

“Wahudumu wetu wa kibinadamu nao wanaripoti kuwa katika siku za karibuni maeneo kadhaa ya kuhifadhi wakimbizi yamekumbwa na uporaji. Takribani wakimbizi 56,000 wamehamia kwenye vituo vipya 34 vilivyoanzishwa kwenye maeneo tofauti tofauti mjini Goma,” amesema Dujarric.

Wakati huo huo, wanawake, wanaume na watoto 390,000 bado wako kwenye kambi za wakimbizi mjini Goma na viunga vyake.

Miundombinu imeharibiwa

Amezungumzia pia uharibifu wa miundombinu kama vile shule ambapo amesema takribani 80 zimeharibiwa, vituo 27 vya afya vimeporwa au kuharibiwa, huduma ya elimu na afya imevurugwa.

Takribani wanafunzi 400,000 wameathiriwa vibaya na mapigano ya hivi karibuni mjini Goma na viunga vyake.

Huduma za kibinadamu zasitishwa Djugu, Ituri

Huko mjini Djugu, jimboni Ituri, Mashariki mwa DRC, ghasia zimelazimu wahudumu wa kibinadamu kusitisha huduma zao, na hivyo kuvuruga usaidizi kwa watu 30,000.

Huko Kivu Kusini, wadau wa kibinadamu wanaripoti kuweko kwa uporaji katika maeneo ya Bukavu, mwishoni mwa wiki ikiwemo katika bohari ya shirika la Mpango wa Chakula duniani, WFP.

Watu wamesaka hifadhi kwenye makanisa na vituo vya kuhifadhi watu, huku mamlaka zikiwa na hofu ya kusambaa kwa ugonjwa wa mpox jimboni Kivu Kusini, kwa kuwa wagonjwa wengi wamekimbia vituo vya tiba kuhofia usalama wao.

♦ Kurambaza ukurasa mahsusi wa Siku ya Kiswahili Duniani bofya hapa.

♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili hapa.

♦ Pia unaweza kupakua apu ili kusikiliza matangazo yetu wakati wowote popote ulipo.

♦ Tembelea pia chaneli yetu ya Youtube na pia Soundcloud na Twitter

HABARI MAHSUSI KUHUSIANA NA TAARIFA HII

Makazi ya wakimbizi wa ndani ya Lushagala Kivu Kaskazini nchini DRC. (Maktaba)

DRC: Mashambulizi yakishamiri, sinfohamu yakumba wakimbizi

14 Februari 2025

Wahamiaji na Wakimbizi

Shirika la Umoja wa Mataifa la Kuhudumia Wakimbizi, UNHCR, lina wasiwasi mkubwa kuhusu janga la kibinadamu linalozidi kuwa baya tena kwa kasi kubwa huko Mashariki mwa Jamhuri ya Kidemokrasia ya Congo, DRC, kwani kushindwa kufikia wahitaji kumekwamisha ufikishaji misaada ya haraka inahoyitajika.

Ukiukaji wa haki za binadamu katika DRC wataharakisha MONUC

21 Februari 2008

Shirika la MONUC linalohusika na Ulinzi wa Amani katika Jamhuri ya Kidemokrasi ya Kongo (JKK/DRC)limeripoti kuingiwa na wasiwasi mkuu kuhusu kuendelea kwa ukiukaji wa haki za binadamu nchini. Kwa mujibu wa taarifa za Ofisi ya MONUC inayohusika na haki za binadamu,imeeleza kwamba uchunguzi wao umethibitisha mauaji ya watu wanane, wakiwemo watoto watatu wasio hatia, yalitukia tarehe 02 Januari katika kijiji kilichopo Goma, eneo la mashariki. Kwa mujibu wa MONUC mauaji haya yaliendelezwa na askari wa Jeshi la Taifa la Kongo.