Gaza: Mapigano makali yanaendelea, watoto wanazaliwa na uzito mdogo na kufunguliwa hospitali

Wakati kukiwa na mapigano makali zaidi yaliyoripotiwa huko Gaza bado, wasaidizi wa kibinadamu wa Umoja wa Mataifa Jumatano walirudia onyo kwamba njaa bado ni tishio la karibu kwa sababu ya vikwazo vya misaada na ukosefu wa upatikanaji salama.

Zaidi ya miezi saba tangu vita hivyo kuzuka upya, watoto wachanga bado wanazaliwa wakiwa na uzito mdogo sana, limeonya shirika la Umoja wa Mataifa la kuhudumia wakimbizi wa Kipalestina, UNRWA.

“Habiba alizaliwa katika hema ndogo. Ana umri wa wiki mbili na uzito wake ni chini ya kilo mbili,” limesema shirika hilo la Umoja wa Mataifa kwenye chapisho klake kupitia mtandao wa, na kuongeza kuwa zaidi ya wanawake 150,000 wajawazito na wanaonyonyesha wanaendelea kukabiliwa na hali mbaya ya usafi na hatari za kiafya.

Kwa mujibu wa UNRWA kuendelea kwa mashambulizi ya wanajeshi wa Israel, kwenye Ukanda wa Gaza kwa njia ya angani, ardhini na baharini kunazidisha vifo vya raia, kulazimika wengi kukimbia na uharibifu mkubwa wa miundombinu ya makazi na miundombinu mingine muhimu ya raia. 

Pia mashirika ya kibinadamu ya Umoja wa Mataifa leo yameendelea kuonya kuhusu hali mbayá ya Rafah Gaza ambako mashambulizi ya Israel yanaendelea kukatili maisha ya watu na kulazimisha maelfu kufungasha virago tena kwenda kusaka usalama. 

© UNICEF/Eyad El Baba Shule ya UNRWA huko Khan Younis ambapo watu wa Gaza wamesaka hifadhi imesalia magofu.

Mashambulizi yanashika kasi

Shirika la UNRWA limeongeza kuwa na mashambulizi ya ardhini ya Israeli yanaendelea kupanua wigo, haswa katika maeneo ya kusini mwa mji wa Gaza na Mashariki mwa Rafah, hususan karibu na Kerem Shalom na vivuko vya Rafah.

Kana kwamba hayo hayatoshi Philippe Lazzarini ambaye ni Kamishina Mkuu wa UNRWA amesema kumekuwa na jaribio lingine la uchomaji moto la watoto na vijana wa Israel kwenye majengo ya UNRWA huko Jerusalem jana usiku. 

Akiweka video fupi inayoonyesha moto ukiwaka nje ya majengo ya ofisi hizo kwenye ukurasa wake wa mtandao wa kijamii wa X Lazzarini amesema imetosha na mashambulizi hayo lazima yakome.

WFP Shaima Al-Zant (kushito) akiwa na mwanaye Fadi Al-Zant (Kulia) miongoni mwa wanaotibiwa utapiamlo Rafah

Uzito mdogo na utapiamlo

Shirika la Umoja wa Mataifa la Mpango wa Chakula Duniani WFP limeangazia changamoto kubwa ambayo wazazi wanakabiliana nayo kuwaweka watoto wao salama na kuwalisha. 

Ili kuepusha utapiamlo, WFP inasambaza tende zilizoimarishwa, ikiwa ni pamoja na kwa wazazi Khaled na Siham, ambao "baadhi ya siku wanakosa chakula ili kuwaachia watoto wao kidogo walicho nacho".

Kulingana na WFP, utapiamlo miongoni mwa watoto unaendelea katika kasi iliyoweka rekodi, ambapo mtoto mmoja kati ya watatu walio chini ya umri wa miaka miwili sasa ana utapiamlo au kudhoofika.

Umoja wa Mataifa na washirika wake wana uwezo wa kuongeza misaada kwa watu wote milioni 2.2 huko Gaza, lakini ikiwa tu usitishaji wa mapigano wa kibinadamu utatokea, wakala huyo alisisitiza.

Likimulika zaidi watoto shirika la Umoja wa Mataifa la kuhudumia watoto UNICEF limesema Kuongezeka kwa uhasama huko Rafah na kote katika Ukanda wa Gaza kumeongeza mateso ya mamia ya maelfu ya watoto, ambao wamevumilia jinamizi lisiloisha kwa siku 218 zilizopita.

Shirika hilo limerejea wito wake wa kukomeshwa mara moja uhasama ili kuokoa maisha ya raia wasio na hatia wakiwemo malaki ya watoto.

WFP limesema linaendelea kujitahidi kusambaza msaada wa chakula licha ya changamoto kubwa za kiusalama na miundombinu. 

© UNRWA Wananchi wa Kipalestina katika ukanda wa Gaza wanakimbia tena huku wanajeshi wa Israel wakizidisha mashambulizi ya mabomu Rafah.

Mapigano mazito

Wakati huo huo, juhudi za kutoa misaada zimeendelea huku kukiwa na ripoti ya mapigano ya bunduki kati ya wanajeshi wa Israel na wapiganaji wa Kipalestina huko Jabalia kaskazini na Rafah kusini.

Hadi sasa, Rafah imewaondoa watu wasiopungua 600,000 katika wiki iliyopita tu, na wengine 100,000 wameng'olewa kutoka kaskazini mwa eneo hilo, huku kukiwa na amri mpya ya kuwahamisha iliyotolewa na wanajeshi wa Israel.

"Familia zinaendelea kutoroka kwenda wanakoweza, ikiwa ni pamoja na kuharibu vifusi na matuta ya mchanga, kutafuta usalama, lakini hakuna kitu kama hicho huko Gaza," UNRWA imesema katika na picha zinazoonyesha msusruru wa magari yakielekea pwani, baadhi yakiwa na mizigo na mali za familia nzima.

Ofisi ya uratibu wa misaada ya kibinadamu ya Umoja wa Mataifa, OCHA, imesema timu za kutoa misaada zinaendelea kujaribu kutoa msaada wa kuokoa maisha popote na wakati wowote inapowezekana, ingawa kivuko kikuu cha mpaka cha Rafah bado kimefungwa, na "hakuna njia salama kwenye kivuko cha karibu cha Kerem Shalom ambayo haiwezekani kwa utaratibu".

© WHO/Mohammed Dahman Majeruhi akitibiwa katika hospitali ya Nasser Khan Younis Januari 2024

Hospitali ya Nasser kufunguliwa tena

Katika habari njema ambazo ni adimu, OCHA imeripoti kuwa hospital ya Nasser Medical Complex huko Khan Younis inatarajiwa kufunguliwa rasmi tena katika siku zijazo.

Hospitali hiyo, ambayo iko kusini mwa Khan Younis na ambayo hapo awali ilikuwa moja ya hospitali kubwa zaidi huko Gaza, ilipigwa makombora wakati wa mashambulizi makali ya Israel mwezi Februari. 

Vikosi vya Israel pia viliingia katika kituo hicho baada ya wiki kadhaa za mapigano na kukizingira.

Sasa, hospitali hiyo imeanza tena kutoa matibabu ya kusafisha figo wiki iliyopita kwa wagonjwa ambao hawawezi tena kutibiwa katika Hospitali ya An Najjar huko Rafah, "ambayo imeacha kutoa huduma", OCHA imesema katika tarifa hiyo.