Kimbunga Emnati kuongeza zahma Madagascar:WFP
Msaada wa Kibinadamu
Shirika la Umoja wa Mataifa la mpango wa chakula WFP limesema kimbunga Emnati kilichoikumba Madagascar Jumatano ya wiki hii (23/02/2022) kikiwa kimbunga cha nne kulikumba taifa hilo katika wiki kadhaa kinatishia uhakika wa chakula na ni mfano wa kjinsi gani cangamoto za mabadiliko ya tabianchi zisiposhughulikiwa zinaweza kusababisha mahitaji makubwa ya kibinadamu.
Kimbunga hicho kinatarajiwa kuzidisha tatizo la njaa na hatari ya mafuriko na tathimini hii imetolewa siku chache kabla ya kutoleewa kwa ripoti ya jopo la kimataifa kuhusu mabadiliko ya tabianchi IPCC.
Athari za vimbunga Madagascar
WFP inasema kikizikumba jamii zilizo hatarini ambazo tayari zimefikia mwisho, Kimbunga Emnati kinatarajiwa kuzidisha njaa ikiwa ni pamoja na katika maeneo ya kusini mwa Madascar, ambayo yamekuwa yakikabiliwa na ukame mkali wa miaka mingi ikiwa ni dhihirisho jingine la hatari ya nchi hiyo kutokana na mabadiliko ya tabianchi
“Vimbunga Emnati, Dumako, Batsirai na Ana vimeharibu taifa la kisiwa cha Madagascar na kusababisha uharibifu mkubwa wa ardhi ya kilimo ikiwa ni pamoja na zao la mpunga ambalo lilikuwa limebakiza wiki chache kabla ya kuvunwa. Mazao ya biashara kama vile karafuu, kahawa na pilipili pia yameathirika kwa kiasi kikubwa. Katika nchi ambayo watu wengi wanajikimu kutokana na kilimo, wastani wa asilimia 90 ya mazao yanaweza kuharibiwa katika baadhi ya maeneo ya mikoa iliyoathirika.” Limeongeza shirika la WFP.
Dhoruba hizo za mfululizo zimeathiri usambazaji wa soko na uwezekano wa kupandisha bei ya chakula na kusababisha uhaba wa chakula kuongezeka katika miezi ijayo.
"Tunachokiona nchini Madagascar ni athari mbaya za mabadiliko ya tabianchi ambazo ni mfululizo wa dhoruba na ukame wa muda mrefu unaoathiri mamia kwa maelfu ya watu," amesema Brian Lander, naibu Mkurugenzi wa Dharura wa WFP.
Ameongeza kuwa "Wakati WFP inatoa chakula muhimu baada ya dhoruba, tunahitaji pia kufikiria haraka jinsi jumuiya hizi zitakavyoweza kujenga mnepo dhidi ya ukweli huu mpya unaowakabili."