Wazee wakimbizi takriban 500,000 hatarini kupata COVID-19 Afrika:UNHCR 

21 Januari 2021

Shirika la Umoja wa Mataifa la kuhudumia wakimbizi UNHCR limeonya kwamba zaidi ya wazee 500,000 barani Afrika wako hatarini kupata virusi vya corona au COVID-19 endapo hatua madhubuti hazitachukuliwe sasa na wadau wote kuwalinda.

Kwa mujibu wa shirika hilo wengi wa wazee hao wakimbizi hawana fursa za kutosha za kupata huduma za msingi kama maji, afya na vifaa vya usafi na kujisafi hali inayowaweka hatarini zaidi na hivyo wanahitaji msaada wa haraka kuweza kulindwa dhidi ya janga la COVID-19 ambalo hadi sasa limeshakatili maisha ya watu zaidi ya milioni mbili duniani kote. 

UNHCR imeongeza kuwa barani Afrika wazee wanathaminiwa na jamii zao na wengi ni babu, nyanya, mama, baba, wajomba na shangazi katika jamii hizo na wanaleta furaha, upendo, hekima na busara zinazotegemewa na wengi. Betty Sandi mkimbizi kutoka Sudan anaishi kambini Uganda na nyanya yake anayempenda  sana,“Ninapopata chakula nabakisha kiasi kwa ajili ya nyanya yangu, nitafanya lolote niwezalo kwa ajili yake” 

Takwimu za shirika hilo la wakimbizi zinaonyesha kuwa kuna zaidi ya wazee 500,000 ambao ni wakimbizi na waomba hifadhi Afrika na ni miongoni mwa makundi yaliyo hatarini zaidi kuambukizwa virusi vya corona na kusahaulika. Fadou kutoka Somalia ni mmoja wa wazee hao wakimbizi na anaishi kwenye kambi ya wakimbizi ya Kakuma nchini Kenya anasema,“Natumai na kuomba kwamba Mungu atatulinda na kutuepusha dhidi ya gonjwa hili na kutupa amani”. 

UNHCR inasisitiza kwamba sasa kinachohitajika ni hatua za haraka ili kulinda na kuokoa maisha ya ajuza hawa ambao ni urithi na lulu ya Afrika. 

 

♦ Kutembelea ukurasa maalum wa COP26 bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter