Serikali chukueni hatua ualimu uwe chaguo la kwanza la ajira kwa vijana

5 Oktoba 2019

Ikiwa leo ni siku ya walimu duniani, viongozi wa mashirika  manne ya Umoja wa Mataifa na wadau wake wametaka hatua za makusudi zichukuliwe ili kuvutia vijana kwenye tasnia hiyo adhimu.

Viongozi hao ni Audrey Azoulay wa UNESCO, Guy Rider wa ILO, Henrietta Fore wa UNICEF, Achim Steiner wa UNDP na David Edwards wa shirika la Education International.

Katika taarifa yao ya pamoja kwa siku ya leo yenye ujumbe, Walimu vijana, mustakabali wa tasnia ya ualimu, viongozi hao wamesema, “leo hii kufuatia kile tulichojifunza kutoka kwa mbobezi wa fizikia, Albert Einstein, tunasherehekea utaalam, nguvu na wito wa walimu, ambao ndio msingi wa mifumo ya elimu ijayo. Bila kizazi kipya cha walimu wenye motisha, mamilioni ya wanafunzi wataachwa nyuma, au wataendelea kuachwa nyuma kwenye haki yao ya kupata elimu.”

Albert Einstein alinukuliwa akisema kuwa, ni utaalamu wa juu kabisa wa mwalimu wa kuamsha ari ya maelezo bunifu na ufahamu ambapo viongozi hao wamesema kwa sasa nukuu hiyo ina changamoto.

Wamesema ingawa walimu wenyewe ndio kitovu cha kuendeleza tasnia hiyo, bado kuna changamoto kwa sababu ili waweze “wengi wao hawalipwi vizuri na hawathaminiwi jambo ambalo inafanya vigumu sana tasnia hiyo kuwavutia vijana.”

Wameongeza kuwa tasnia hiyo inazidi kumomonyoka kwa kasi kubwa duniani kutokana na mazingira duni ya kazi na fursa finyu za kujiendeleza na zaidi ya yote, “kuna ukosefu wa rasilimali kwa watoto wenye mahitaji maalum ya elimu na wale wenye  ulemavu, wakimbizi na wale wanaofahamu zaidi  ya lugha moja.”

Kwa mantiki hiyo wametaka hatua za dharura kwa kuwa takwimu za UNESCO zinatia wasiwasi mkubwa zikionesha kwamba, “dunia inahitaji walimu milioni 69 ili kufikia lengo la elimu la ajenda 2030. Iwapo walimu hao hawatopatikana, pengo la ukosefu wa usawa duniani litaongezeka.”

Nchi za Afrika zilizo kusini mwa jangwa la Sahara ndio zenye uhaba zaidi wa walimu ikiwa ni kwa asilimia 70 na kiwango kinafikia asilimia 90 kwenye ngazi ya sekondari.

UNESCO inasema hali ni mbaya zaidi vijijini kwa sababu ya walimu kukimbilia mijini kutafuta maslahi.

© UNHCR/Diana Diaz
Wanafunzi wana nafasi kubwa ya kufanikiwa kimasomo ikiwa kuna miundombinu na walimu wazuri.

Ili kufanikisha lengo la kuwa na walimu bora, UNESCO inataka mbinu mpya zitumike katika kuajiri walimu, kuwafundisha, kuwapatia motisha na kupata walimu wenye ujuzi zaidi kwenye karne hii ya 21.

Halikadhalika wakuu hao wa mashirika ya Umoja wa Mataifa na wadau wanatoa wito kwa vyombo vya habari na mbinu nyingine mpya za mawasiliano vitumike kuinyanyua tasnia ya ualimu na kuonyesha umuhimu wake kwa haki za binadamu, haki, na mabadiliko ya tabianchi.

“Serikali nazo lazima ziboreshe mazingira ya ajira na kazi kwa waliu. Hili ni jambo la dharura kwa kuzingatia uhaba wa walimu vijana wa kuziba pengo la walimu milioni 48.6 wanaotarajiwa kustaafu kwenye muongo ujao,” wamesema viongozi hao.

Wametoa wito kwa serikali zichukue hatua za makusudi ili kazi ya ualimu iwe chaguo la kwanza kwa vijana.

 

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud