Ukatili umesababisha zaidi ya watoto milioni 1.9 kusitisha masomo magharibi na Afrika ya Kati-UNICEF

23 Agosti 2019

Zaidi ya watoto milioni 1.9 wamelazimika kukatisha masomo yao magharibi na Afrika ya kati kwa sababu ya ongezeko la mashambulizi na vitisho vya kikatili dhidi ya elimu katika ukanda huo, imesema ripoti ya Shrikia la Umoja wa Mataifa la kuhudumia watoto, UNICEF leo Ijumaa.

Kwa mujibu wa ripoti, kufikia mwezi juni 2019 shule 9,222 zilifungwa nchini Burkina Faso, Cameroon, Chad, Afrika ya Kati, Jamhuri ya Kidemokrasia ya Kongo, Mali, Niger na Nigeria kwa sababu ya ukosefu wa usalama hii ikiwa ni mara tatu zaidi ya idadi iliyoripotiwa mwishoni mwa mwaka 2017.

Ripoti hiyo ikipewa jina Elimu hatarini magharibi na Afrika ya kati inaonya kuwa vitendo vya kulengwa kwa maksudi kwa shule, watoto na walimu kunakoshuhudiwa katika ukanda huo, kunawanyima watoto haki yao ya kusoma na kuwaacha wao na jamii zao katika mazingira ya hofu kwa ajili ya maisha yao na mustakabali wao.

Moja ya watoto ambao amejikuta katika hali kama hiyo ya kutokuwepo shuleni ni Clarisse akiwa nchini Cameroon.

Video ya UNICEF inamuonyesha Clarisse akiwa na mdogo wake akitizama mto.

Naibu Mkurugenzi Mkuu wa UNICEF, Petri Gornitzka akizungumzia ripoti hiyo amesema, “mashambulizi ya kulenga na yasiyokoma dhidi ya mifumo ya elimu ambao ni msingi wa amani na maendeleo yamewacha giza kwa watoto, familia na jamii kote ulimwenguni.”

Mtoto Clarrisse ameshuhudia mashambulizi hayo anasema, wanateketeza shule, wanateketeza maeneo ambako watu wanatembea, wanateketeza nyumba za watu, wanateketeza watu wakiwa ndani ya nyumba, wanateketeza kila sehemu.

Ukosefu wa usalama katika maeneo ya kaskazini magharibi na kusini magharibi nchini Cameroon kumesababisha shule 4,400 kufungwa katika maeneo hayo na zaidi ya shule 2,000 zimefungwa nchini Burkina Faso, pamoja na shule 900 nchini Mali kwa sababu ya ongezeko ya ukatili katika nchi hizo.

Kaitka ukanda wa Sahel katikati, Burkina Faso, Mali na Niger zimeshuhudia ongezeko mara sita zaidi ya kufungwa kwa shule kwa sababu ya mashambulizi na vitisho vya ukatili katika kipindi cha miaka miwili kutoka 512 Aprili 2017 hadi 3,005 mwezi Juni mwaka huu wa 2019. Nchi nnw zilizoathirika na janga katika bonde la ziwa Chad ni Camerron, Chad, Niger na Nigeria ambako viwango vimesalia vya juu kati ya 981 hadi 1,054 katika ya mwisho wa mwaka 2017 hadi Juni 2019.

UNICEF inafanya kazi na mamlaka za elimu na jamii kwa ajili ya kusaidi njia mbadala kwa ajili ya fursa za kupata elimu ikiwemo vituo vya jamii vya elimu, shule kupitia radio, teknolojia ya kufundisha na kusoma na miradi ya kidini.

UNICEF inatoa pia vifaa kwa walimu wanaofanya kazi katika maeneo hatarishi na pia msaada wa kisaikolojia kwa watoto wa shule wanaochwa na makovu ya ukatili.

Watoto walioathirika na mzozo magharibi na Afrika kati wanajumuisha mtoto 1 kati ya 4 kote ulimwenguni wanaohitaji msaada wa kibinadamu ikiwemo elimu na huduma zingine za kuwawezesha kusoma.

UNICEF na wadau wametoa wito kwa serikali, vikosi vilivyojihami na pande husika kwenye mzozo na jamii ya kimatiafa kuchukua hatua kusitisha mashambulizi na vitisho dhidi ya shule, wanafunzi na kuunga mkono elimu kwa kila mtoto katika ukanda huo.

Kufikia Agosti 12 kuna pengo la ufadhili la asilimia 72 wa kusaidia program za watoto.

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud