Watoto milioni 20 walikosa chanjo za kuokoa maisha 2018- UNICEF/WHO 

15 Julai 2019

Makadirio mapya yaliyotolewa leo na shirika la Umoja wa Mataifa la kuhudumia watoto UNICEF na shirika la afya duniani WHO kuhusu masuala ya chanjo yanaonesha mwenendo wa hatari wa kuzorota kwa viwango vy utoaji chanjo kote duniani kutokana na vita, kutokuwepo kwa usawa na malalamiko. 

Makadirio ya mashirika hayo mawili yanasema watoto milioni 20 kote duniani sawa na zaidi ya mtoto 1 kati ya 10 alikosa chanjo ya kuokoa maisha kama ya surua, dondakoo na pepopunda kwa mwaka 2018.

Kimataifa tangu mwaka 2010 duniani kote dozi tatu za chanjo ya dondakoo na pepopunda na dozi moja ya chanjo ya surua hazijaongezeka zimesalia katika silimia 86 ingawa inaonekana ni ya juu lakini haitoshelezi yamesema makadirio hayo ambayo yamesisitiza asilimia inayotakiwa kwa chanjo ni 95 duniani, katika nchi zote na jamii zote ili kuwalinda watoto dhidi ya milipuko ya magonjwa yanayoweza kuzuilika kwa chanjo.

Akisistiza hilo Mkurugenzi Mkuu wa WHO Dkt. Tedros Adhanom Ghebreyesus amesema “chanjo ni moja ya nyenzo zetu muhimu sana kwa ajili ya kuzuia milipuko ya magonjwa na kuiweka dunia salama. Wakati watoto wengi wanapatiwa chanjo siku hizi lakini bado kuna wengi wanaoachwa nyuma. Ingawa haikubaliki mara nyingi walio katika hatari zaidi ni masikini, waliotengwa, walioathirika na vita na waliolazimika kukimbia makwao.”

Watoto wengi ambao hawajachanjwa kwa mujibu UNICEF na WHO wanaishi katika nchi masikini ambazo hazijiwezi na ziko kwenye athari kubwa za vita.Na Karibu nusu ya watoto hao wote wako kwenye nchi 16 ambazo ni pamoja na Afghanistan, Jamhuri ya Afrika ya Kati CAR, Chad, Congo DRC, Ethiopia, Haiti, Mali, Iraq, Niger, Nigeria, Pakistan, Somalia, Sudan Kusini, Syria na Yemen. Na endapo watoto hao wakiugua basi wako kwenye htari kubwa ya kiafya na uwezekano mkubwa wa kukosa matibabu na huduma.

UNICEF/Kiran Panday
Lethal Katwal, mtoa chanjo akiwa ameshikilia chanjo dhidi ya Surua katika kituo cha afya huko kijiji cha Bungamati wilaya ya Lalitpur jimboni Kathmandu nchini Nepal.

Pengo katika upatikanaji wa chanjo

Makadirio pia yamedhihirisha pengo kubwa katika fursa ya upatikanaji wa chanjo ambalo linaendelea katika nchi mbalimbali na za vipato vya viwango vyote. Na hali hii imechangia kwa kiasi kikubwa mlipuko wa surua sehemu mbalimbali duniani ikiwemo katika nchi ambazo kwa ujumla zina viwango vya juu vya chanjo.

Mwaka 2018 karibu visa 350,000 vya surua viliripotiwa duniani kote vikiwa ni zaidi ya mara mbili ya ilivyokuwa 2017.

Kwa mujibu wa Henrietta Fore Mkurugenzi Mtendaji wa UNICEF “surua ni ishara halisi ya wapi tunakotakiwa kuongeza juhudi ya kupambana na magonjwa yanayoweza kuzuilika kwa sababu surua inaambukiza na mlipuko huelekea kwa jamii ambazo zinakosa chanjo kutokana na kutopata fursa, gharama au katika baadhi ya maeneo kutokana na malalamiko. Ni lazima tusake kila mbinu ili kumchanja kila mtoto.”

Kwa sasa mashirika hayo yanasema Ukraine inaoongoza orodha ya nchi zilizoripotiwa kuwa na visa vingi vya surua kwa mwaka 2018. Wakati nchi hiyo sasa imeweza kutoa chanjo kwa asilimia 90 ya watoto wote kiwango kimekuwa kidogo kwa miaka mingi na hivyo kuiacha idadi kubwa ya watoto wenye umri mkubwa na watu wazima bila chanjo na katika hatari ya maambukizi.

PAHO/WHO
Chanjo ya HPV hupatiwa kwa wasichana ili kuepusha saratani ya kizazi. Pichani ni nchini Brazil msichana akipatiwa chanjo hiyo ambayo hutolewa kwa wanafunzi wa shule za umma na binafsi

Chanjo ya HPV

Na kwa mara ya kwanza UNICEF na WHO wanasema kuna takwimu kuhusu utoaji wa chanjo dhidi ya virusi vinavyosababisha saratani ya shingo ya uzazi HPV chanjo ambayo inawalinda wasichana dhidi ya saratani hiyo katika siku za usoni.

Takwimu hizo zinaonyesha kwamba hadi kufikia mwaka 2018 nchi 90 kote duniani ambazo ni maskani ya msichana 1 kati ya 3 zimeanza kujumuisha chnjo ya HPV katika program zake za afya. Ni nchi 13 tu kati ya hizo ndio nchi za kipato cha chini hali inayowaacha mamilioni ya walio katika hatari ya athari za saratani ya shingo ya uzazi katika uwezekano wa kutopata chanjo.

 

 

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud