Watoto wa Rohingya 720,000 mashakani-UNICEF

23 Februari 2018

Msimu wa mvua na pepo kali unaokaribia pamoja na ghasia kwa upande mwingine ni mwiba kwa watoto zaidi ya 700,000 waliokumbwa katika mgogoro wa wakimbizi wa Rohingya.

Mkurugenzi wa UNICEF anayehusika na miradi ya dharura, Manuel Fontaine,amesema kuwa takriban watoto 720,000 ni kama wamezingirwa au wako makazi ya muda  ya kulazimishiwa huko Myanmar au wanaishi kwenye kambi zilizojaa pomoni nchini Bangladesh kwa sababu hawawezi kurudi makwao. Akihofia athari za msimu huo wa mvua  Viviane van Steirteghem mkuu wa ofisi ya UNICEF Cox Bazar

(SAUTI YA VIVIANE VAN STEIRTEGHEM)

“Tuna msimu wa mvua unakuja na tuna mengi ya kujiandaa , tunajua baadhi ya watu vado wanaishi katika maeneo ya mwinuko milimani na kunaweza kuwa na maporomoko , na tunafahamu kwamba watu wengi wanaishi katika maeneo ambayo yatafurika kabisa.”

Ameongeza kuwa kambi za wakimbizi pia huenda zikaathirika na hivyo

( SAUTI YA VIVIANE VAN STEIRTEGHEM)

“Fursa ya huduma za afya, elimu, ulinzi wa watoto vitatoweka, na hata fursa ya maji safi na usafi , tunahitaji kuliangalia kwa makini hili kwa sababu viko hatarini.”

Ripoti hiyo inatolewa wakati ni miezi sita tangu warohingya waanze upya kukimbilia kusini mwa Bangladeshi wakitokea Myanmar.

Ripoti inaendelea kueleza kuwa takriban watoto 185,000 bado wamekwamia katika jimbo la Rakhine nchini Myanmar ambako waliachwa na wazazi wao waliotoroka ghasia.

 

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud