Dola milioni 200 kusaidia Yemen kukabili Kipindupindu

28 Agosti 2017

Benki ya Dunia imetangaza mkopo nafuu wa dola milioni 200 kwa Yemen ili iweze kukabiliana na mlipuko wa ugonjwa wa kipindupindu.

Kristalina Georgieva, ambaye ni Afisa Mtendaji Mkuu wa benki hiyo amesema fedha hizo zitasaidia kuimarisha mifumo ya maji, afya na majitaka nchini humo na pia kuepusha milipuko ya ugonjwa huo siku za usoni.

Mathalani kupitia mkopo huo wenye masharti nafuu, wahudumu wa afya 7,500 watapatiwa mafunzo ili kuimarisha uwezo wao wa kutibu wagonjwa, halikadhalika uwekaji wa vidonge vya kutakatisha maji na pia kuendesha kampeni za kuhamasisha afya ya umma.

Fedha pia zitatumika kwenye utoaji chanjo dhidi ya kipindupindu wakati huu ambapo zaidi ya wananchi nusu milioni wameambukizwa ugonjwa huo katika kipindi cha miezi mitano iliyopita.

Bi. Georgieva amesema ni muhimu zaidi hivi sasa kwa Benki ya Dunia kuwekeza katika miundombinu ya afya na maji nchini humo ili kuhakikisha hata amani itakaporejea, wananchi wako tayari kushiriki kikamilifu kujenga nchi yao.

 

♦ Kutembelea ukurasa maalum wa UNGA76 bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter