Mashauriano kuhusu Yemen kuanza Geneva Jumapili, Ban kuhudhuria

12 Juni 2015

Mashauriano kati ya pande kinzani nchini Yemen yanatarajiwa kuanza Jumapili hii huko Geneva, Uswisi ikiwa ni n’gwe nyingine ya kujaribu kumaliza mzozo unaoendelea nchini humo.

Katibu Mkuu wa Umoja wa Mataifa Ban Ki-moon anatarajiwa kufungua mashauriano hayo yatakayoongozwa na mjumbe wake maalum huko Yemen Ismail Ould Cheikh Ahmed.

Mkurugenzi wa habari kwenye ofisi ya Umoja wa Mataifa huko Geneva, Ahmad Fawzi amesema mashauriano hayo ni sehemu ya mchakato wa amani na kwamba ni hatua muhimu sana kwani ni ya kwanza kuhusisha pande mbali mbali tangu chuki zilivyoanza tena nchini Yemen.

Amesema kwa mantiki hiyo yatakuwa ni sehemu muhimu na ni matumaini  yao kuwa pande hizo zitashiriki vyema ili kuanza mwelekeo wa kumaliza tofauti zao.

Washiriki ni pamoja na wajumbe wa baraza la ushirikiano wa ghuba, GCC, na kutoka Riyadh na Sana’a. Halikadhalika kundi la nchi 16, G16 ambazo ni pamoja na China, Ufaransa, Urusi na Marekani.

 

♦ Kupata takwimu za waathirika vitani Ukraine bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter