Azimio dhidi ya DPRK lapendekeza suala kuwasilishwa ICC

18 Disemba 2014

Baraza kuu la Umoja wa Mataifa leo limepitisha azimio kuhusu ukiukwaji wa haki za binadamu huko Jamhuri ya Kidemokrasia ya watu wa Korea, DPRK, likiamua pamoja na mambo mengine kuwasilisha mbele ya Baraza la Usalama ripoti ya Tume iliyochunguza ukiukwaji huo wa haki.

Azimio hilo ambalo lilipitishwa kwa kura 116, huku mataifa 20 yakipinga na mengine 53 kutoonyesha msimamo wowote, linataka Baraza la usalama lizingatie mapendekezo ya Tume na kuchukua hatua stahili za kuhakikisha uwajibikaji ikiwemo kuwasilisha suala hilo kwenye mahakama ya kimataifa ya makosa ya jinai, ICC.

 Halikadhalika Baraza kuu linataka baraza la usalama liangalie pia uwezekano wa vikwazo dhidi ya wakiukwaji wa haki kama ilivyobainishwa kwenye ripoti ya tume.

 Baadhi ya haki zilizobainishwa kukiukwa kwa mujibu wa azimio hilo ni pamoja na zile za kiuchumi, kijamii na kitamaduni ambazo zimesababisha njaa na tapiamlo hususan kwa watoto, wanawake, watu wenye ulemavu na wazee.

 

♦ Kupata takwimu za waathirika vitani Ukraine bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter