Wanaojitolea kudhibiti Ebola wanapaswa kulindwa siyo kunyanyapaliwa: Ban

27 Oktoba 2014

Katibu Mkuu wa Umoja wa Mataifa Ban Ki-moon ameeleza wasiwasi wake juu ya vizuizi vilivyowekwa hivi karibuni dhidi ya watu waliotembelea nchi zilizokumbwa na ugonjwa wa Ebola.

Msemaji wa Umoja wa Mataifa Stéphane Dujarric amemkariri Ban akisema kuwa vizuizi hivyo vinaweka shinikizo zaidi kwa wahudumu wa afya ambao wamekuwa mstari wa mbele kukabiliana na Ebola.

(Sauti ya Dujarric)

“Wahudumu wa afya wanaorejea kutoka maeneo hayo ni watu wa kipekee waliojitolea kwa ajili ya ubinadamu. Hawapaswi kukumbwa na vizuizi visivyozingatia misingi ya kisayansi. Hao wanaopata maambukizi wanapaswa kusaidiwa badala ya kunyanyapaliwa.”

Msemaji huyo amemkariri Katibu mkuu akisisitiza kuwa njia pekee ya nchi kujikinga dhidi ya Ebola ni kusaidia kuepusha kusambaa zaidi kwa ugonjwa huo huko Afrika Magharibi.

Amesema jambo hilo linahitaji kupelekwa wahudumu zaidi wa afya na kuwapatia msaada wanaporejea nyumbani kwani jamii ya kimataifa ina wajibu wa kuwalinda.

 

♦ Kutembelea ukurasa maalum wa UNGA76 bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter