Mkurugenzi Mkuu mpya wa IAEA aanza kazi rasmi Vienna

1 Disemba 2009

Yukiya Amano, Mkurugenzi Mkuu mpya wa Shirika la UM juu ya Matumizi ya Amani ya Nishati ya Nyuklia (IAEA) ameanza kazi rasmi, hii leo, Ijumanne mjini Vienna. Kwenye taarifa kwa waandishi habari ameeleza ya kuwa "mazingira yaliozikabili shughuli za taasisi yao kwa sasa ni ya zahma tupu."

Mkurugenzi Amano alieleza Shirika la IAEA limekabiliwa na masuala magumu" kadha wa kadha, na atajaribu, kwa uwezo wake, kusaidia kuyatatua masuala haya kwa utaratibu unaofaa, hasa yale masuala yanayojumlisha uzuiaji wa uenezaji wa silaha za kinyuklia, maamirisho ya usalama wa huduma za kinyuklia, taratibu za kukidhi mahitaji ya nishati kwa kutumia viwanda vya kinyuklia, na uwezekano wa kudhibiti bora teknolojiya ya nyuklia kwenye uangalizi wa afya, na pia usimamizi unaofaa katika kudhibiti rasilmali ya maji. Aliahidi kwamba, yeye binafsi, atajitahidi kuyatekeleza majukumu yake bila ya upendeleo na kwa kutegemewa, kwa uwiano na wadhifa wa kitaaluma alionao. Aliyaomba Mataifa Wanachama yote kumsaidia katika kuyakamilisha maadili hayo kikazi.

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud