Umma wa nchi masikini utafadhiliwa msaada wa tiba rahisi ya malaria

17 Aprili 2009

Kutoka mji wa Oslo, Norway kumeanzishwa rasmi, leo Ijumaa, ushirikiano mpya wa kimataifa wa kuwasaidia mamilioni ya watu wanaogua maradhi ya malaria duniani, hasa wale wanaoishi katika nchi za Asia na mataifa ya Afrika kusini ya Sahara. Mradi huu utawapatia umma huo uwezo wa kumudu dawa za tiba ya malaria, dawa ambazo hunusuru maisha ya mgonjwa, hususan wale watoto wa umri mdogo.

Ushirikiano huu unatarajia, awali, kufadhilia dola milioni 225 zitakazotumiwa kuwapatia, kwa urahisi, umma muhitaji wa nchi masikini dawa ya kupambana na malaria sugu. Bayana hii iliripotiwa na Waziri wa Nchi za Kigeni wa Norway, Jonas Gahr Store, ambaye taifa lake ni miongoni mwa wadau husika wakuu wa mradi huu wa malaria pamoja na mataifa mengine tajiri, yakichanganyika na taasisi nyengine zinashughulikia misaada ya maendeleo.

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud