Viongozi wa wenyeji wa asili walioshiriki kwenye mijadala ya kikao cha karibuni cha mwaka, cha Tume ya Kudumu ya UM juu ya Masuala ya Haki za Wenyeji wa Asili walisisitiza kwenye risala zao, kwa kauli moja, ya kwamba haiyafalii Mataifa Wanachama kuendelea kupoteza wakati katika kipindi cha kihistoria ambapo kunahitajika kuuidhinisha halan ule mwito wa Baraza la Haki za Binadamu wa kukomesha ubaguzi dhidi ya wenyeji wa asili, na kuupatia umma huu uliotengwa kijamii haki zao halali, hasa kwenye juhudi za kudhibiti na kutunza ardhi na rasilmali ziliopo kwenye maeneo yao.

Ijumatano ya tarehe 20 Juni mwaka huu iliadhimishwa katika sehemu kadha wa kadha za ulimwengu kuwa ni ‘Siku ya Wahamiaji Duniani’, kumbukumbu zilizoshika fora katika kipindi ambapo pia kulitolewa mwito muhimu unaohimiza jumuiya ya kimataifa kukuza ushirikiano wao katika kuwasaidia wenziwao waliofurushwa makwao na kunyimwa makazi na maskani. Kadhalika mnamo siku hiyo kuliwasilishwa onyo lenye kuhadharisha walimwengu ya kwamba idadi ya wahamaji huenda kuongezeka katika kipindi kijacho.

Raisi wa Baraza la Usalama kwa mwezi Juni, Balozi Johan Verbeke wa Ubelgiji aliwaambia waandishi habari kuwa wawakilishi wa Baraza hilo wanayaunga mkono maafikiano ya mazungumzo ya 17 Juni yaliokubaliwa Dar-es-Salaam, Tanzania baina ya Raisi wa Burundi Pierre Nkurunziza pamoja na kiongozi wa kundi la wanamgambo la Palipehutu-FNL, Agathon Rwasa.

Mazungumzo ya siku mbili yaliodhaminiwa na UM, juu ya Sahara ya Magharibi, yaliofanyika wiki hii katika kitongoji cha Manhasset, New York kati ya Morocco na Chama cha Ukombozi wa Sahara ya Magharibi cha Frente Polisario, na ambayo vile vile yalijumuisha wawakilishi wa mataifa jirani na Sahara Magharibi ya Algeria na Mauritania, yalikamilishwa kwa makubaliano kuwa makundi husika yatarejea tena New York mnamo wiki ya pili ya Agosti kuendelea na majadiliano yao ya kutafuta suluhu ya kudumu na kuriidhisha juu ya mgogoro wa eneo hili la Afrika Kaskazini.