Masuala ya UM

HAPA NA PALE

Shirika la UM juu ya Ulinzi wa Amani katika Cote d’Ivoire (UNOCI) limemaliza kuondosha kituo chake cha mwisho cha uangalizi, katika ile sehemu ya nchi inayojulikana kama Eneo la Msitari wa Kijani, eneo liliotenga sehemu ya kusini, iliokuwa chini ya mikono ya vikosi vya serikali, kutoka ile sehemu ya kaskazini ya nchi, ambayo baadhi ya maeneo yake bado yapo chini ya mamlaka ya waasi wa zamani wa kundi la Force Nouvelles. Eneo la Msitari wa Kijani lenye upana wa kilomita 20 na urefu wa kilomita 600, katikati ya Cote d’Ivoire, ni sehemu ya amani iliowekwa makhsusi, na kudhibitiwa na vikosi vya kimataifa, kwa kulingana na mapatano ya amani ya Ougadouguo, kusaidia kusitisha vita vya wenyewe kwa wenyewe nchini na kujenga hali ya kuaminiana miongoni mwa makundi yaliokuwa yakikhasimiana.

ECOSOC imekamilisha kikao cha mwaka

Baraza la UM juu ya Uchumi na Jamii (ECOSOC) Ijumaa lilikamilisha mkutano wa mwaka, wa msingi, uliofanyika Makao Makuu ya UM mjini New York. Mkutano ulichukua karibu mwezi mmoja, na kwa mara ya kwanza wajumbe waliokusanyika mkutanoni walifanyisha kikao maalumu cha Halmashauri ya Ushirikiano wa Maendeleo ya Kiufundi (DCF).

Jamii ya kimataifa inahimizwa na KM kuimarisha ari ya Olimpiki

KM wa UM Ban Ki-moon amewasilisha risala maalumu, kwa kupitia njia ya vidio kuhusu Michezo ya Olimpiki ya mwaka huu itakayofanyika Beijing, Uchina. Risala imependekeza vita isitishwe kote duniani katika kipindi chote michezo ya Olimpiki inafanyika Uchina, kuanzia mwezi Agosti. Kwa mujibu wa risala ya KM, malengo ya maadili ya kimsingi ya Michezo ya Olimpiki hufanana sawa na yale ya UM: hasa katika kukuza mafahamiano na kuhishimiana kati ya wanadamu; na katika majukumu ya kuandalia umma wa kimataifa fursa ya kufanikiwa, kwa usawa, kimaendeleo kwa kufuata taratibu na sheria; na muhimu ya yote katika kuimarisha utulivu na amani kwa wote.

Hapa na Pale

Ijumatatu, Baraza Kuu la UM limepitisha, kwa kauli moja, pendekezo la KM la kumteua Jaji Navanethem Pillay wa Afrika Kusini kuwa Kamishna Mkuu mpya wa UM juu ya Haki za Binadamu, kwa muda wa miaka minne, kuanzia Septemba 2008. ~~

Kwa Ufupi:

Baada ya kushauriana na Raisi wa Baraza Kuu, pamoja na Wenyekiti wanaowakilisha makundi matano ya kikanda yanayohusiana na Mataifa Wanachama, KM wa UM ameripoti kwa Baraza Kuu uamuzi wake wa kumteua Navanethem Pillay wa Afrika Kusini kuwa Kamishna Mkuu mpya wa UM juu ya Haki za Binadamu baada ya Jaji Louise Arbour wa Kanada, ambaye alimaliza muda wa kazi, baada ya iaka mitano na UM, mnamo Juni 30 2008. Tangu 2003 Pillay alikuwa Jaji wa Mahakama ya Kimataifa ya Jinai ya Halaiki (ICC) na kabla ya hapo, katika 1999 aliteuliwa kuwa Jaji Kiongozi wa Mahakama ya UM juu ya Rwanda (ICTR), taasisi ambayo alijiunga nayo 1995 baada ya kuteuliwa na Baraza Kuu; na mnamo 1998 Jaji Pillay aliongezewa muda wa kutumikia Mahakama ya ICTR kwa miaka minne zaidi.

Hapa na Pale

Raisi Omar al-Bashir wa Sudan alipozuru mji wa El Fasher katika Darfur, alipata fursa ya kukutana, kwa muda mfupi na Mjumbe Maalumu wa Pamoja kwa Darfur wa UM/UA, Rodolphe Adada pamoja na viongozi wengine wa shirika la mchanganyiko la UM-UA linalosimamia ulinzi wa amani katika Darfur (UNAMID).

HAPA NA PALE

KM ameikaribisha hatua ya utiaji sahihi wa Taarifa ya Mwafaka (MOU) kati ya makundi yaliohasimiana Zimbabwe, kwa matumaini ya kutia moyo, utaratibu ambao umeweka msingi wa makubaliano ya kuanzisha mazungumzo rasmi ya kumaliza mzozo wa kisiasa nchini. KM alimpongeza Raisi Thabo Mbeki wa Afrika Kusini na timu yake ya wapatanishi kwenye juhudi zao zilizowezesha mwafaka huo kutiwa sahihi. UM upo tayari kusaidia,kwa kila njia, kwenye jitihadi zote za upatanishi nchini Zimbabwe,alisema KM.

Hapa na Pale

Serge Brammertz Mwendesha Mashitaka Mkuu wa Mahakama ya UM juu ya Makosa ya Vita kwa iliokuwa Yugoslavia (ICTR) amewasilisha ripoti maalumu kwa waandishi habari Ijumatatu (21 Julai) ya kupongeza kukamatwa kwa Radovan Karadzic, kiongozi wa kisiasa wa Waserb wa Bosnia na mtoro aliyekimbia adhabu ya sheria kwa muda mrefu katika Bosnia-Herzegovina. Karadzic alishikwa na wenye madaraka Serbia na sasa yupo kizuizini. Karadzic alishitakiwa rasmi na Mahakama ya ICTR miaka 13 iliopita kwa kuongoza makosa dhidi ya utu na mauaji ya halaiki kwa raia wa Bosnia-Herzegovina wasiokuwa Waserb - yaani Wacroat na WaIslamu wa huko. Tutakupatieni taarifa zaidi Ijumanne.

Hapa na Pale

Baraza la Usalama limekutana Ijumaa kuzingatai shughuli za Mahakama ya UM juu ya Rwanda (ICTR) na pia kufanya mapitio ya ripoti ya KM kuhusu ombi la Nepal la kutaka UM usaidie kuimarisha mpango wa amani nchini humo. Baraza la Usalama limeamua kuongeza muda wa kazi kwa majaji wanaohusika na mauaji ya Rwanda, ili kuhakikisha kesi zilizosalia zinakamilishwa kwa muda unaotakiwa na ICTR.

Kundi la G-8 lakusanyika Ujapani kuzingatia maendeleo ulimwenguni

Wakati viongozi wa Kundi la G-8 wanakusanyika katika kisiwa cha Ujapani kaskazini cha Hokkaido, kwenye Mkutano Mkuu wa mwaka, KM Ban Ki-moon, ambaye pia anahudhuria mkusanyiko huo, aliwaambia waandishi habari hii leo kwamba hatua za haraka zinatakikana kuchukuliwa na mataifa yenye utajiri wa viwandani, kutekeleza zile ahadi walizotoa siku za nyuma, za kuongeza kwa mara mbili zaidi misaada ya maendeleo kwa Afrika pale itakapofika 2010.