Ripoti ya Mapitio ya Mwaka 2008 ya Shirika la UM juu ya Matumizi ya Amani ya Nishati ya Nyuklia (IAEA) imebainisha idadi kubwa ya mataifa yamependekeza kuwa na viwanda vya kizalendo vya kinyuklia, kuzalisha umeme.

Mikataba ya Geneva juu ya Hifadhi ya maisha na hishima ya wanadamu wasioshiriki kwenye mapigano - hususan, raia, wafanyakazi wa afya, wahudumia misaada ya kiutu, pamoja na wagonjwa, wanajeshi majeruhi na mateka wa vita - imetimia miaka 60 mnamo tarehe ya leo, 12 Agosti 2009. KM ameeleza kwenye taarifa aliotoa juu ya kumbukumbu hiyo kwamba kanuni ya Mikataba ya Geneva zimefanikiwa "kudumishwa na kuvumiliwa na umma wa ulimwengu kwa muda mrefu" kwa sababu ya umuhimu unaopewa sheria hizo na jumuiya ya kimataifa. KM alipendekeza kwa Mataifa Wanachama yote kuchukua hatua zinazofaa, kuhakikisha kanuni za kimsingi za Mikataba ya Geneva huwa zinatekelezwa na wote kama ipasavyo.

Tarehe ya leo, Agosti 12, inahishimiwa na UM kuwa ni Siku Kuu ya Kimataifa kwa Vijana. Kwenye risala aliotoa kuadhimisha siku hii, KM Ban Ki-moon alikumbusha matatizo yaliowakabili vijana kwa hivi sasa, vijana wa kiume na wa kike duniani, huathiri bila kiasi fungu hili la umma wa kimataifa, kwa sababu ya kuanguka kwa shughuli za uchumi kwenye soko la kimataifa na kutokana na athari za mabadiliko ya hali ya hewa.

Shirika la Afya Duniani (WHO) limearifu hii leo kutoka mjini Geneva, kwa kupitia msemaji wake Fadéla Chaib, ya kuwa kila Ijumanne litakuwa likitangaza taarifa mpya juu ya maambukizi ya homa ya mafua ya A/H1N1 ulimwenguni.