Habari Mpya

Ufukuzaji wa raia baina ya Angola na JKK waongeza kasi, imehadharisha UM

20 Oktoba 2009

OCHA imeripoti kwaamba katika kipindi cha miezi miwili iliopita, imeshuhudia muongezeko mkubwa wa idadi ya wahamiaji wa JKK wanaofukuzwa kutoka Angola, na kulazimishwa kuvuka mipaka kurejea makwao.

OCHA inasema haki za binadamu zinaendelea kuharamishwa na makundi yanayohasimiana katika JKK

20 Oktoba 2009

Elizabeth Byrs, Msemaji wa Ofisi ya UM juu ya Misaada ya Dharura (OCHA) leo aliwaambia waandishi habari mjini Geneva kwamba taasisi yao inalaani ukiukaji wa haki za binadamu, unaoendelezwa na makundi yanayohasmiana katika JKK.

Hapa na pale

20 Oktoba 2009

Ofisi ya UM juu ya Misaada ya Dharura (OCHA) imetangaza tena ilani ya kuwahadharisha walimwengu kwamba zaidi ya watu milioni 23 wanaoishi katika Pembe ya Afrika, huenda wakaathiriwa na mvua kali na mafuriko yanayoashiriwa kuchochewa na mfumo wa hali ya hewa ya El Nino. Taarifa ya OCHA ilitilia mkazo ya kuwa umma unaokabiliwa na hatari ya kudhurika zaidi na hali hiyo - katika mataifa ya Usomali, Kenya, Uganda, Tanzania na Djibouti na Eritrea na Ethiopia - ni zile jamii zinazojumlisha wafugaji, wakazi wa vijijini, wakulima pamoja na wahamiaji wa ndani na wale wa kutoka nchi za kigeni.

Maelfu ya waliong'olewa mastakimu Kivu Kaskazini waanza kurejea makwao, imetangaza OCHA

20 Oktoba 2009

Ofisi ya UM juu ya Misaada ya Dharura (OCHA) imeeleza kwamba katika miezi miwili iliopita, inakadiria watu 110,000 waliong\'olewa makazi na mapigano waliweza kurejea makwao katika jimbo la Kivu Kaskazini la JKK.

Abu Garda ametuhumiwa makosa ya vita na ICC

20 Oktoba 2009

Vile vile tukizungumzia Sudan, Mwendesha Mashtaka wa Mahakama ya Kimataifa juu ya Makosa ya Jinai ya Halaiki (ICC), ambayo inakutana leo Ijumatatu mjini Hague, Uholanzi imethibitisha kuwepo mashtaka ya makosa ya vita dhidi ya kiongozi wa waasi wa Darfur, Bahr Idriss Abu Garda ambaye anatuhumiwa kuhusika na mashambulio dhidi ya walinzi amani wa Umoja wa Afrika katika Sudan mnamo tarehe 29 Septemba 2007.

UNAMID imehadharisha, mapigano huenda yakafufuka tena Darfur Kazkazini

20 Oktoba 2009

Kadhalika, Shirika la UNAMID limeelezea wasiwasi mkubwa kuhusu muongezeko wa vikosi vya Serikali ya Sudan na waasi wa kundi la SLA la Abdul Wahid katika maeneo ya Sortony na Kabkabiya, yaliopo Darfur Kaskazini, vitendo ambavyo vilishuhudiwa, kihakika, na waangalizi wanajeshi wa UNAMID.

Majambazi wameshambulia kihorera polisi watatu wa UNAMID katika Darfur Magharibi

20 Oktoba 2009

Mnamo Ijumamosi iliopita, kwenye eneo la Zalingei, Darfur Magharibi majambazi wasiotambuliwa waliwapiga risasi na kujeruhi walinzi amani polisi watatu, wanaowakilisha Shirika la Vikosi vya Mchanganyiko vya UM-UA kwa Darfur (UNAMID), na imeripotiwa hali ya majeruhi wawili kuwa ni mbaya sana kwa hivi sasa.

Serikali za Africa zajiendeleza kiutawala, lakini rushwa bado inakithiri, inasema ripoti ya UM

19 Oktoba 2009

Ripoti mpya ya UM, iliotolewa tarehe 16 Oktoba 2009, kusailia shughuli za utawala katika bara la Afrika, ilibainisha ya kuwa katika miaka minne iliopita, maendeleo machache yalipatikana kwenye viini vya harakati za utawala, na ilidhihirisha, tatizo la ulajirushwa katika Afrika, lilifurutu ada na kuongezeka kwa kiwango kikubwa katika kipindi hicho.

Hapa na pale

19 Oktoba 2009

John Holmes, Naibu KM Mdogo juu ya Masuala ya Kiutu anatazamiwa kufanya ziara maalumu Uganda kuanzia tarehe 20 mpaka 24 Oktoba, ili kuhudhuria Mkutano Mkuu Maalumu wa Umoja wa Afrika (UA) juu ya Wahamiaji, Warudiwaye Makwao na Wahamiaji wa Ndani wa Afrika. Kadhalika, wakati Holmes atakapokuwepo Uganda anatazamiwa kufanya tathmini juu ya hali nchini Uganda, ambapo jumuiya ya wahudumia misaada ya kiutu inashirikiana na Serikali kuhakikisha watu milioni mbili waliong’olewa makazi na mashambulio ya waasi wa kundi la LRA huwa wanapatiwa suluhu na utulivu wa kudumu wa kuridhisha kimaisha.

Hapa na pale

17 Oktoba 2009

Ofisi ya UM juu ya Misaada ya Dharura (OCHA) imeripoti nchi ziliopo kwenye Pembe ya Afrika, ambazo karibuni zilisumbuliwa na ukame wa kihistioria, hivi sasa zinajiandaa kukabilina tena na maafa mengine yanayoletwa na majira ya hali ya hewa ya El Nino, hali ambayo inatarajiwa kuzusha mafuriko makuu kwenye eneo hilo. OCHA ilitahadharisha kuna uwezekano mkubwa mataifa ya Kenya, Usomali, Tanzania na Uganda huenda yakadhurika na miporomoko ya ardhi kwa sababu ya El Nino, mfumo wa hali ya hewa unaotarajiwa pia kuathiri na kuharibu mavuno, kuzusha maradhi yanayosababishwa na maji machafu na kuharibu mitandao ya mabarabara. Kadhalika, OCHA imesema maafa hayo huenda yakadhuru vile vile mataifa ya Djibouti, Eritrea na Ethiopia. John Holmes, Mratibu wa Misaada ya Kufarajia Dharura alidhihirisha ya kuwa watu milioni 23 sasa hivi wanapepesuka, na kusumbuka, na athari za upungufu wa chakula na maji safi na salama, na vile vile wanakabiliwa na uhaba wa maeneo ya malisho ya wanyama, migogoro sugu na hali ya wasiwasi ambayo huathiri sana jamii za wakulima, wafugaji na wale wenye kuishi kwenye mitaa ya mabanda ya vitongoji vya miji mikuu, na huathiri pia wahamiaji wa ndani ya nchi na kutoka mataifa jirani."