Habari Mpya

Jan Pronk ataendelea kuwa Mwakilishi Maalumu wa UM kwa Sudan

Wiki hii KM Kofi Annan alikutana kwa mashauriano na Jan Pronk, Mjumbe wake maalumu anayeongoza lile Shirika la Ulinzi wa Amani la UM nchini Sudan, yaani UNMIS. Hivi majuzi Serekali ya Sudan iliripotiwa kumpiga marufuku Pronk kuwepo nchini.

Umoja wa Mataifa (UM) unaadhimisha Siku Kuu ya kuzaliwa kwake

Ijumanne tarehe 24 Oktoba huadhimishwa kote duniani na watumishi wa kimataifa kuwa ni ‘Siku Kuu ya UM’ na mwaka huu ilisherehekea mwaka wa 61 tangu Mkataba wa UM kuidhinishwa rasmi kuwa ni chombo kamili cha kanuni za kimataifa.

WFP yalalama, upungufu wa michango unahatarisha maisha ya mamilioni kusini ya Afrika

Shirika la UM juu ya Miradi ya Chakula Duniani (WFP) limenakiliwa likiripoti ya kuwa limelazimika kupunguza ile posho ya chakula wanayofadhiliwa watu muhitaji milioni 4 katika eneo la kusini ya Afrika, kwa kima kikubwa zaidi, kwa sababu ya uhaba wa michango kutoka wahisani wa kimataifa.

UM unahimiza hali ya utulivu iendelezwe katika DR Congo wakati wa duru ya pili ya uchaguzi wa uraisi

UM umetoa nasaha kwa wale viongozi wenye kugombea kiti cha uraisi katika Jamhuriya Kidemokrasi ya Kongo (DR Congo), kwenye duru ya pili ya uchaguzi utakaofanyika mwisho wa wiki [Ijumapili], kuendelea kuheshimu muungano wa taifa kabla na baada ya upigaji kura kumalizika, bila ya kuzusha mfarakano kutokana na tofauti za kimawazo.

Baraza la Usalama kuridhia kuanzishwa ofisi ya kuimarisha amani Burundi

Baraza la Usalama limepitisha, kwa kauli moja, azimio la kuanzisha ofisi maalumu mpya nchini Burundi (Bureau Integre des Nations Unies au Burundi, BINUB)itakayopewa dhamana ya kusaidia kujenga utulivu wa kudumu nchini baada ya Shirika la UM juu ya Ulinzi wa Amani (ONUB) kukamilisha operesheni zake mwisho wa mwaka (31 Disemba 2006).

Jukumu la wachoraji makatuni kustawisha amani duniani

Mapema wiki hii Idara ya Habari ya UM iliandaa semina maalumu iliyohudhuriwa na wachoraji makatuni mashuhuri wa kimataifa ambao walibadilishana mawazo juu ya taratibu zifaazo kutumiwa kwenye usanii wao zitakazosaidia kusukuma mbele amani na, hatimaye, kukomesha ile tabia ya kutovumiliana kati ya raia wa tamaduni tofauti. ~

Wahamiaji wa Burundi katika Tanzania kupatiwa makazi mapya Marekani

Shirika la UM juu ya Huduma za Wahamiaji (UNHCR) limeripoti kuwa Serekali ya Marekani ipo tayari kuwapatia makazi mapya wale wahamiaji 13,000 wa Burundi pamoja na wazawa wao ambao wanayoyoma kwenye kambi za wahamiaji nchini Tanzania tangu 1972 pale walipokimbia mauaji ya halaiki nchini mwao.

Eritrea yashtumiwa kuharamisha mapatano ya kusitisha mapigano mipakani

KM Kofi Annan akijumuika na Baraza la Usalama wiki hii wametoa taarifa ya pamoja kuishtumu Eritrea kwa kupeleka vifaru 15 na pia wanajeshi karibu 1,500 kwenye lile Eneo la Muda la Usalama (TSZ) liliopo mipakani na Ethiopia.

UM waomba msaada wa dharura kunusuru maisha ya wahamiaji wa Usomali katika Kenya

UM umetoa ombi la dharura uitakayo jamii ya kimataifa kufadhilia dola milioni 35 ili kukidhia mahitaji ya kihali kwa wahamiaji 35,000 wa Usomali waliopo Kenya hivi sasa ambao asilimia kubwa yao ni wafugaji walioathirika na hali ya uhasama uliozuka makwao ikichanganyika na ukame.

Watu 126 wakhofiwa kufa kwenye Ghuba ya Aden

Shirika la UM juu ya Huduma za Wahamiaji (UNHCR)limeripoti kwamba katika wiki za karibuni watu 126 kutoka Afrika Mashariki walifariki au kupotea walipokuwa wanajaribu kuvuka Ghuba ya Aden baada ya kutupwa majini kutoka meli na mashua za wafanya magendo.