Habari Mpya

Hapa na pale

Ijumaa asubuhi KM Ban Ki-moon, akijumuika na wafanyakazi wa UM waliopo kwenye Mkao Makuu, pamoja na maofisa wa vyeo vya juu, ikijumlisha Naibu KMAsha-Rose Migiro walikusanyika kwenye Ukumbi wa Baraza la Udhamini kuwakumbuka watumishi wenziwao watano waliouawa Ijumatano, na wapinzani wa Taliban, ndani ya nyumba ya wageni, kwenye mji wa Kabul, Afghanistan. Watumishi waliouawa walitokea Philippines, Marekani, Ghana na Liberia. Mtu wa tano hajatambuliwa bado uraia wake, ikisubiriwa matokeo ya vipimo vya afya vinavyoendelezwa na madakatari kuthibitisha asili ya maiti. Kabla ya wafanyakazi wa UM kusikiliza taarifa ya KM juu ya tukio, na miradi inayoandaliwa kuimarisha usalama wa watumishi wa UM waliopo nje, hasa katika Afghanistan, walisimama wima kimya kwa dakika moja kuwakumbuka na kuwaombea wenziwao waliouawa na shambulio la bomu la kujitoa mhanga. Baadaye mke wa askari wa usalama aliyeuawa kutoka Ghana alihutubia mkusanyiko huo na aliomboleza juu ya kifo cha mumewe, marehemu Lawrence Mefful. Kwenye risala yake, KM alisema UM sasa hivi unafanya mapitio ya dharura juu ya mazingira ya usalama, kwa ujumla, nchini Afghanistan. Alisema UM unazingatia vile vile uwezekano wa kupeleka vikosi ziada vya usalama kuhakikisha majengo ya UM yanapatiwa ulinzi na hifadhi bora kujikinga na mashambulio.

Watu milioni moja huuawa kila mwaka na maradhi ya chakula kisio salama, imehadharisha WHO

Wataalamu wa Shirika la Afya Duniani (WHO), wanaohusika na maradhi yanayosababishwa na chakula, wamekusanyika wiki hii mjini Geneva kujadilia hatari ya vyakula visio salama, na hadhi ya maisha bora yanayohitajika kwa umma wote wa dunia.

Taarifa mpya ya WHO kuhusu homa ya A/H1N1

Hii leo, Shirika la Afya Duniani (WHO) limetangaza taarifa mpya juu ya maendeleo, katika udhibiti bora wa homa ya mafua ya A/H1N1.

Siku ya Kimataifa Kudhibiti Nimonia

Tarehe 02 Novemba, itaaadhimishwa, kwa mara ya kwanza na walimwengu, kuwa ni Siku ya Kimataifa Kudhibiti Homa ya Vichomi/Nimonia.

KM aomba msaada ziada kuhudumia usalama kwa watumishi wa UM

Alkhamisi, KM Ban Ki-moon ametoa onyo lenye kuhadharisha ya kuwa, hivi sasa, watumishi wa UM hivi sasa tumegeuzwa kuwa "walenghwa dhaifu", na yale makundi yalionuia kutuhujumu kihorera, bila kujali adhabu.

Mataifa wanachama 187 yalaumu vikwazo vya Marekani dhidi ya Cuba kwenye Baraza Kuu

Mnamo Ijumatano ya wiki hii, kwa mwaka wa 18 mfululizo, wawakilishi wa kimataifa kwenye Baraza Kuu la UM walipiga kura ya kuunga mkono, kwa mara nyengine tena, azimio la kuishtumu Marekani kwa vikwazo vyake vya kiuchumi, kifedha na kibiashara dhdi ya Cuba.

IAEA imepokea jawabu ya awali ya Iran kuhusu yuraniamu halisi kwa viwanda vya utafiti wa tiba

Mohamed ElBaradei, Mkurugenzi Mkuu wa Shirika la UM juu ya Nishati ya Nyuklia kwa Matumizi ya Amani (IAEA) leo amepokea jawabu ya awali kutoka Serikali ya Iran kuhusu pendekezo linaloitaka madini ya yuraniamu halisi, inayotumiwa kwenye Kiwanda Cha Utafiti wa Matibabu cha Teheran kupelekwa nchi za nje kusafishwa.

Matatizo ya nchi zinazoibuka kutoka mapigano yatafutiwa suluhu ya kudumu na UM

Warsha Maalumu juu ya Chakula na Mizozo ya Kiuchumi kwenye Mataifa Yaliobuka kutoka Mapigano na Vita ulifanyika asubuhi kwenye Makao Makuu.

UM unasema 'majaribio ya mauaji ya raisi Usomali ni hujma dhidi ya raia wote'

Majaribio mawili ya karibuni ya kutaka kumwua Raisi wa Usomali, Sharif Sheikh Ahmed yalilaaniwa vikali kwenye taarifa kwa vyombo vya habari iliotolewa na Mjumbe Maalumu wa UM kwa Usomali, Ahmedou Ould-Abdallah, ambayo aliyafananisha na mashambulio ya mauaji dhidi ya raia wote wa Usomali.

Mkariri wa UM anayetetea haki za wateswa amefukuzwa Zimbabwe

Manfred Nowak, Mtaalamu wa UM juu ya masuala ya mateso, na vitendo vyengine visio vya kiutu vyeye kudhalilisha hadhi ya ubinadamu, alkhamisi alitangaza, kutokea Johannesburg, Afrika Kusini ya kuwa ana wasiwasi juu ya madai ya kuwepo hali mbaya, iliokiuka haki za kiutu za wafungwa, katika magereza ya Zimbabwe, taarifa aliowakilisha saa 24 baada ya kunyimwa ruhusa ya kuingia nchini humo kuendeleza uchunguzi kuhusu madai hayo.