Mazingira duni ni 'mwiba' kwa afya, sasa hatua zachukuliwa

31 Mei 2018

Mashirika mawili ya Umoja wa Mataifa yamekubaliana kuanzisha  mkakati maalum wa pamoja utakaosaidia kudhibiti athari za kiafya zinazosababishwa na mazingira duni. Grace Kaneiya na ripoti kamili.

Mashirika hayo, lile la afya WHO na lile la hali ya hewa, WMO yamesema mazingira duni yanayosababishwa na mabadiliko ya tabianchi husababisha vifo vya zaidi ya watu milioni 12.6 kila mwaka.

Makubaliano hayo mapya sasa yaliyoridhiwa mjini Geneva, Uswisi kati ya Mkurugenzi Mkuu wa WHO Dkt. Tedros Ghebreyesus na Katibu Mkuu wa WMO Dkt. Petteri Taalas, yatajikita katika kukuza uelewa kwa undani, jinsi ya kutatua changamoto hizo za kiafya zinazohusiana na mabadiliko ya tabianchi ya  muda mrefu.

Mathalani yatatoa kipaumbele katika ufuatiliaji wa hatari za afya zitokanazo na mazingira, kama vile mionzi mikali ya jua aina ya UV, hewa chafu pamoja na maji yasiyo safi na salama.

Dkt. Taalas amenukuliwa akisema kuwa utafiti umebaini kuwa kimbunga Maria kilichopiga Puerto Rico na kusababisha vifo vya watu 64 kinahusishwa pia na vifo vingine vya watu 4,645 kutokana na kutokuwepo kwa  huduma za afya, kukatika kwa umeme na uharibifu wa miundombinu mingine.

Naye Dkt. Tedros amesema kila mwaka zaidi ya watu milioni 12 hupoteza maisha kutokana na kutumia maji machafu, kuvuta hewa chafu na kemikali mbalimbali hewani.

 

Audio Credit:
Grace Kaneiya
Audio Duration:
1'24"

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud